Ekainaren 14tik 17ra Xabier Insausti eta Juan Ezeiza irakasleak Barin (Italia) izango dira LeGoP (Learning Good Practices in European Countries) proiektua ixteko.

LeGoP 2014-15 eta 2015-16 ikasturteetan zehar garatzen aritu gara. Heziketa, formazioa, gazteria eta kirola bultzatzen dituen Erasmus Plus programa europarraren barruko proiektua da.

LeGoP inguruan hiru herrialdetako bost erakunde bildu gara:

• Axular Lizeoa eta Gureak gizarte ekimeneko kooperatiba (Euskadi)
• Bari-ko (Italia) Salvemini Lizeoa eta Elpendu gizarte ekimeneko kooperatiba
• Amsterdam-eko (Holanda) homofobiaren prebentziorako Gale elkartea

Programaren helburua hirukoitza da:

• Irakaskuntzarako tresna teknologikoen erabilpenean irakasleak trebatzeko curriculuma sortzea, behar bereziei arreta izanez. Curriculuma parte hartzen dugun erakundeotan esperimentatuko da, beranduago interesatuei doan eskainiz.
• Homofobiaren prebentzioan irakasleak formatzeko e-learning ikastaroa egitea.
• Partaideon esperientzia eta jarduera onak bilduko dituen tresna-multzoa (toolkit) garatzea.

Hori dena bost hizkuntzatan prestatu dugu: euskara, ingelesa, italiera, holandera eta gaztelania. Horretarako, hiru herrialdeotan bilerak, ikasle eta irakasleen hainbat trukaketa eta azken horientzako formazio-saioak antolatu dira. Oraingo honetan programaren elementu guztiak bukatuko ditugu.

Argazkian bost erakundeotako ordezkariak Bari-ko Salvemini Lizeoaren atarian proiektuko lehen bileraren ostean.